622全民公投有感

 

2014-6-23 11:25:23

網絡圖片

網絡圖片

【文:言輕】

6月22日,全民投票日,筆者日前已用手機投票,本不提算到票站,可是,當天下午收到舊同學的Whatsapp短訊,令筆者改變主意。

舊同學:今日我又想到啲嘢,忍唔住又同你講。我見到有啲13,15歲嘅細路因「新界地」事件(新界東北發展撥款)俾人拉咗,可能喺刑事,咁就一世。

筆者:你嘅諗法,正正係一般香港中產家長嘅想法,阿仔,行咁前做乜呢?亦係政府最想香港下一代變成對社會事情不關心,遇不公義事情袖手旁觀。你認為每天不會有青少年犯法嗎?而以往又有多少社運青少年藏械呢?

舊同學:現在政府喺衰過鬼,但眼見啲咁樣嘅細,思想、心智未成熟嘅,俾人講幾句竟然蠢到咁樣俾人拉。

筆者:如果你認為呢兩個少年攞刀去示威,係長毛、黃之峰等人唆使佢地,俾人講幾句做,更唔合理。因為長毛、黃之峰從來冇叫人帶刀去示威,如果邏輯成立,上星期個男人打招顯聰兩巴話佢唔愛國,應該入埋共產黨數。根本係佢地自己問題,唔關人地事。做家長應該教子女盡公民責任,遇不公義事情要發聲,以理服人,至於佢地將來點決定,父母管唔到㗎。

舊同學:我好同意你講,啲細路點,佢自己選擇。我哋做人哋父母嘅咪provide 多啲選擇俾佢哋囉。我哋就講政府管治班子衰吖,但出嚟日日開聲話政府果班人,個個目的單純,會唔會呀?

筆者:你話帶頭嘅人有目的?有邊個搞政治冇目的呢?問題係佢地會帶領香港去到邊個level姐,如果將來有真正嘅普選而佢地又做得唔好,我地咪用選票踢佢落台囉!依加狼英咁衰,我地踢唔到佢落去嘛。

舊同學:我唔知你點睇泰國宜家呀,我就覺得邊個上咗都好,對手都唔like, 咁咪得閒出嚟搞吓嘢。搞到夠大鑊咯咪又執位過囉。邊個埋單呀咪成個社會成個國家嘅人民一齊夾錢囉。你記唔記得,因有人衝咗出告士打道,有啲的士司機响金鐘同中環塞咗幾句鐘,你同佢哋講吓,你估佢哋會唔會唔同你講粗口吖嗱。

講實,對上一次你同我講過啲嘢你記唔記得,…….儲定錢送啲細路去外國讀書囉……。我再擴大啲咁想,宜家香港已開始唔適合或可以講已唔容易賺錢啦。不如搵多十年八年錢❨可能5年❩,咪走人囉,唔喺點呀?

筆者:對,有錢送仔女去外國讀書,讀完唔好返,但前提係佢地鍾意。我對香港悲觀唔係因為啲人太激,甚麼香港會亂,而係香港俾大陸蠶食得好緊要,無論政治、經濟、社會文化等,上年暑假狼英去天水圍,成班黑社會撐政府,我果晚瞓唔着,香港再唔係我地成長時候嘅香港了。加上有些香港人仍然無知無奈,以為香港同以前冇分別,所以我咪叫你咁做囉。

泰國同香港點比呀,佢地軍人大哂,根本係結構性問題嚟,香港人公民意識亦強好多,其實初初會亂一點,但你睇台灣依加選舉幾成熟,冇計,呢啲係改變過程嘅「陣痛」,必不可少。況且,香港是我家,點可以冇錢賺就走呢!我地算係中產,有能力有車有樓,係咪應該盡一點力捍衛香港核心價值,出嚟投票同遊行,立個好榜樣俾下一代呢?

坦白講,以前如果香港唔係相對公平,我地唔會有今日嘅安穩生活,例如我做教書要靠關係先入到,用錢先畢到業,或者老豆得罪過人自己冇得升職,以前應該唔會,未來嘅香港,就唔敢包囉。

舊同學:唔知呀,咪搞吓囉,反正我估我都可能睇唔到個好結果❨或者喺壞❩。講實際一點,我哋做生意嘅理得你公唔公義吖,有錢賺就响度冇得做咪第度囉。

筆者:你可以一面賺錢,一面去爭取公義格……。

對話到此為止,兩個70後男性,從中學認識至今近三十年,想不到價值觀已南轅北轍。當天下午,筆者決定再到622公投票站「實體投票」,確保這一票真的能夠發聲。

 

作者簡介:一名中學通識科老師,教育界打滾多年,見盡怯懦、犬儒之輩,深感不在沉默中爆發,便在沉默中滅亡

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s