Tag Archives: 張士佳

向上突破 先買實力派

張士佳

2014-7-24 9:38:04

內地組合拳放水,刺激投資者入市,恆指星期二升394點之後,價量齊升,尋日再升190點,同二萬四關口只係差一步之遙。

見個市突破,好多投資者第一句就問「睇幾多?」,筆者就冇水晶球,真係唔識答,剩係知道過去兩個月個市普經幾次響高位出現大陰燭,令好多人都冇咩信心,冇咩散戶會大手買貨,我相信大戶收左兩個月的貨,冇可能升兩日咁快就玩完。

除左收完貨冇咁快玩完,其實,內地放水亦都冇理由三幾日就完,所以呢兩日全部內銀股起動,動力應該可以維持一段時間,當然,呢d咁重磅嘅股,升幅唔會好似細股咁癲,所以我響電台節目都有提過,可以留意下內銀股的call輪或者牛證。

當然,升左兩日上黎,筆者有唔少朋友會話太高,不過其實同一批朋友,響早一排個市同d股價低d的時候,又會驚繼續跌。其實,多數投資者對高同低的睇法,係睇感覺多過睇估值,跌時驚唔穩,升時又驚高,如果唔克服呢個心理問題,其實係唔駛諗買股票喇。

話說回頭,除左內銀,其實呢兩日仲有好多股都郁,重磅嘅就有電訊、內房同金屬等;若果以總體策略講,建議先睇d領先股,因為之前冇散戶買都可以升嘅股,可以相信係有實力有信心嘅人買緊,家陣個市岩岩開始行,跟進呢d「實力派」會好過冒然去搵d弱雞股去撈底,而就算真係怕高,頂多都係搵d中中間間的去追落後。

除左上面幾個版塊,仲有騰訊(0700)都好值得留意,因為當其他科網股仲係浮浮沉沉之時,佢已經升返到接近3月高位的水平;而重點係,騰訊響8月13日出業績,相信唔會差,加埋阿里巴巴上市,雙重刺激之下,股價唔會差,絕對係我心中的「實力派」之一。

Advertisements

跌唔落升唔上 震倉格局

張士佳

2014-7-22 9:37:18

業績期本周揭幕,藍籌股頭炮係電能(00006)同友邦(01299),估計冇咩驚喜,要到下星期長和系派成績,先多人關注。

有報導指,7月以來,發盈警企業較盈喜公司多六成,其中細價股更加係重災區,之不過,投資市場從來都係向前看,再加埋市場上邊本來就有好多春江鴨,唔會等到發佈盈警先知業績差。統計落黎,盈警時利淡出盡,盈喜時就利好出盡,可能更為常見,所以到發佈盈喜盈警先識去追去沽,就已經太遲喇。

講返個市,其實都係響高位反反覆覆,但亦都同股票盈喜盈警類同,係好消息見頂,壞消息見底;事實上,睇返期指圖,響過去兩個月曾經出支過三支大陰燭(6月6日、6月23日同7月9日),次次都唔係有咩實質利淡的因素,甚至反而係好消息之下的反高潮,但與此同時,又次次都係三幾日就見底炒返上黎,我少少陰謀論咁睇,會認為呢個係大戶震倉的動作,希望繼續吸貨,到吸夠貨喇先再炒上去。

至於最終炒上去的原因,其實唔係太重要,反正港股估值低,再加上滬港通,已經好夠理據,除非有其他不可預期的利淡事件,否則炒上去的機會係好大;至於其他「利好因素」,諸如央企改革、電訊改革等等,其實對大市黎講就唔算太重要,可以留返用黎揀板塊揀股。

而值得一提的是,好多中小型股,雖然有概念,但係未必會炒得中,所以我好多時會放入監察名單,到佢地開始郁先追入去;但假如想買左之後唔點睇的,都係揀d大隻d大路d的比較好,響呢方面,其實資源股係一個值得留意的板塊,尤其是早前升左一批鎳呀鋁呀之後,我相信更加重磅的鋼呀銅呀都會升,而呢個板塊入面,唔少係重磅國企股,可以趁佢地未行,低位入定少少先。